Ginbuksan ang duha ka dugang nga buluthuan sa ciudad sang La Carlota para temporaryo nga tiniran sang mga evacuees sa paglupok sang Bulkan Kanlaon.
Sa interview sang Bombo Radyo kay Ma Elena Espartero, Social Welfare 4 sang City Social Welfare and Development Office, 127 ka mga pamilya gikan sa Brgy Yubo ang gindala sa La Carlota City College.
Suno diri, matawhay kag wala sang problema sa evacuation center kun sa diin bastante ang supply sang pagkaon kag tubig.
Suno pa diri, bangod nga madamo na gid sang evacuees may mga evacuation centers nga napuno na kag may duha ka buluthuan nga ginbuksan agud gamiton para temporaryo nga tiniran sang mga biktima sang paglupok sang bulkan.
Apektado sang paglupok sang bulkan ang Brgy Yubo nga ginalakipan sang sitio Bais, Balangon, Batacon kag Labinsawan kag Brgy Ara-al nga ginalakipan sang sitio Guintubdan, Nailab kag Tinin-awan.
Ginalauman sang pila ka mga evacuees nga makaselebrar sang paskwa sa ila tagsa ka mga balay.
Suno kay Sanny Cervantes, residente sang Brgy Yubo, may kabudlayan ini sa paglakat amo nga paglupok sang bulkan, wala na ini nagduha-duha pa nga mag-evacuate.
Suno diri, wala man sang problema sa ila pagtinir sa evacuation center kag safe man sila bangod yara ang kapulisan nga nagabantay didto.
Ginalantaw sini nga indi lang isa ka semana ang pagtinir nila didto apang ginalauman sini nga indi sila magselebrar sang paskwa sa evacuation center kag sila ang makapauli na.
Samtang dako naman ang nangin bulig sang temporary structures nga ginpatindog sang La Carlota City Disaster Risk Reduction & Management Office (DRRMO) para sa mga evacuees sang paglupok sang Bulkan Kanlaon.
Suno kay Espartero, ang ginpatukod nga temporary structures sa La Carlota City College ang may shower room kag cr nga separado sa lalaki kag babayi kag may ginpatukod man nga kusina kun diin pwede makaluto kag makapanghugas sang kinan-an ang mga evacuees.
Suno diri, indi na ini pagbaklason bangod ini ang magamit sa gihapon kag ini ang makabulig sa mga evacuees nga nagatinir sa buluthuan.
