Ginsunog sang gina-alegar armado nga mga kalalakinhan ang duha ka dump truck kag isa ka back hoe sa Sitio Medel, Barangay Carabalan, Himamaylan City, Negros Occidental alas-8:40 kagab-i.
Sa interview sang Bombo Radyo Bacolod kay 3rd Infantry Division Public Affairs Office sang Philippine Army, ginkumpirmar sini nga ang mga heavy equipments ang ginapanag-iyahan ni Punong Barangay Mildred Grace Titular.
Pahayag sini nga may request nagid man sang security coverage sa area bangod may ongoing man nga construction sang farm-to-market road ang Negros Occidental Provincial Government sa Sitio Sig-ang.
Kadungan sini, nagdesisyon si Titular nga dunganon na lamang ang road construction sa Sitio Medel nga i-angot sini sa farm-to-market road.
Sa ila imbestigasyon sa lugar, ginpahayag sang nakawitness nga mga armado nga lalaki ang nagpanunog sang heavy equipments.
Paathag sini nga wala pa nila na-angot sa New People’s Army ang nasambitan nga pagpanunog.
Apang sa pihak sini, naglunsyar na ang 94th Infantry Battalion sang military operations sa lugar.
