Ginkawatan ang duha ka nakasarado nga establishimento sa Lacson Street, Brgy Mandalagan, Bacolod City.// Ang mga nabiktima ang ginalakipan sang isa ka botique kag lapida maker.
Kaina sang aga, nasiplatan sang tag-iya sang katupad nga karenderia nga ginsulod sang gina-alegar tatlo ka persona ang duha establishimento.
Gingunting nila ang metal nga pader nga sarang lamang masudlan sang isa ka tawo sa botique samtang ginbuhuan man nila ang drainage nga nagalusot sa lapida maker.
Ginreport sang tag-iya sang karenderia sa Bombo Radyo Bacolod nga yara pa sa sulod ang mga kawatan, kag gilayon man nga nagtawag sa Bacolod Police Station 3.
Sa pag-abot sang kapulisan, gintsekyar sang mga ini ang sulod sang mga establishimento, apang wala na sang tawo.
Ginalantaw ang posibilidad nga naggwa ang mga kawatan sang tion nga naglakat ang tag-iya sang karenderia agud magreport.
Apang nadismantle na ang refrigerator sa sulod sang botique kag kaangay nga amat-amat nga ginpagwa ang mga parts bangod frame na lamang ang nabilin.
Nahibaluan nga tatlo ka bulan na nga ginsirad-an ang establishimento bangod sa problema sa building permit, samtang ang duha ka negosyo ang lunsay nagarenta lamang sa lugar.
Ang mga tag-iya ang naga-ayo pa kuntani sa Bacolod City Legal Office nga makuha nila ang mga kagamitan sa sulod, nga wala pa napagwa antes ginsirad-an.
Nacontact naman ang tag-iya sang negosyo kag gin-abisuhan na nga magkoordinar sa Bacolod Police Station 3.
