Patay ang duha ka mga menor de edad matapos nga makuryente sa Purok Ipil-ipil Brgy. Suba, Bayawan City, Negros Oriental sang Marso 12.
Ginkilala ang mga ini kanday Louie Rose kag Louie Jie Bassiote, lunsay mga residente sang nasambit nga lugar.
Sa interview sang Bombo Radyo Bacolod kay Police Lt. Stephen Polinar, Spokesperson sang Negros Oriental Police Provincial Office, nakabaton sila sang report nga may yara sang nakuryente sa nasambit nga lugar.
Suno kay Polinar, santo sa ila nga imbestigasyon, nagapauli ang duha ka mga biktima gikan sa eskwelahan sang ang isa sa mga biktima ang nakadalin-as kag nakauyat sa nadagdag live wire.
Matapos nga makuryente ginbuligan siya sang isa ka biktima nga iya man utod kun sa diin nakuryente man.
Nakahaya na ang mga biktima sa ila nga puluy-an.
Nagpanugyan man ini sa mga pumuluyo nga kun may yara sang nakita nga nagaluyloy ang kable sang kuryente magtawag sa Bureau of Fire Protection ukon mismo sa electric distributor agud nga malikawan ang may makuryente ukon pagluntad man sang sunog bangud sa kuryente.
