Naclaim na sang pamilya ang bangkay sang duha ka gina-alegar katapo sang New People’s Army nga napatay sa magkasunod nga engkwentro sa ciudad sang Sipalay, Negros Occidental.
Sa interview sang Bombo Radyo Bacolod kay Brigadier General Joey Escanillas, sang kaagahon sang July 31, may nabaton sila nga report nga may nakita nga armado nga tawo ang mga sibilyan kag nakilala sang mga ini nga isa sa suspek sa pagpatay sa ciudad sang Sipalay sang nakaligad nga Abril ukon Mayo nga gin-ako man sang NPA.
Suno kay Escanillas, gilayon man nga nagresponde ang katapo sang 15th Infantry Battalion sang Philippine Army sa nabaton nga report gikan sa mga sibilyan sa Sitio Bactolon, Barangay Camindangan, Sipalay City kag nagluntad ang engkwentro nga nagresulta sa kamatayon ni Ka Camil ukon natumod sang pamilya nga si Reygie Fundador, lalaki kag nagaedad sang kapin 23 anyos,.
Suno diri, naclaim na sang pamilya ang bangkay sang napatay kag ini ang residente sang banwa sang Candoni kag aminado ang mga ini katapo sang NPA ang himata.
Nagpatigayon sang hot pursuit operation ang tropa sang gobyerno kun sa diin alas 2:00 ang takna sang hapon sang Agosto 1, nagluntad naman ang engkwentro sa isa naman ka Sitio sa nasambit nga Barangay kun sa diin napatay naman si Alyas Zian.
Si Zian ang reported nga extortionist sang makawala nga grupo kag ang mga ini ang katapo sang remnants sang South West Front.
Sa karun na-claim naman sang pamilya ni Zian ang bankay sini kag suno sa iloy madugay na sini nga ginhambalan nga indi na ini mag-upod pa sa NPA apang wala namati ang iya bata.
