Duha ka mga gina-alegar katapo sang New People’s Army (NPA) ang nagsungka sa 94th Infantry Battalion sang Philippine Army, kasunod sang engkwentro nga nagluntad sa Barangay Buenavista, Himamaylan City kahapon alas-9:40 sang aga.
Sa interview sang Bombo Radyo Bacolod kay Col. J-Jay Javines, commander sa 94th Infantry Battalion, sila ang nag-operate sa area matapos nga makabatun sang impormasyon natuhoy sa presensya sang armado nga grupo.
Ini ang nagresulta sa engkwentro batok sa kapin 9 ka mga remnants sang Central Negros 2 sang Communist NPA Terrorists nga naglawig sang 15 minutos.
Matapos ang engkwentro nagpinalagyo na ang iban nga mga katapo sang NPA sa nagkalainlain nga dereksyon samtang nabilin naman ang duha ka miyembro nga gilayon nga nagsungka sa militar.
Wala na lamang gindisclose ang identity sang mga nagsungka para sa ila nga proteksyon.
Narecover man sa encounter site ang tatlo ka M16 rifles, isa ka M4 rifle, isa ka Garand Rifle, tatlo ka long magazines sang M16, 12 ka short magazines sang M16, duha ka magazines sang M14, tatlo ka bandoliers, duha ka backpacks, isa ka generator, isa ka pares sang rainboots kag subersibo nga mga dokumento.
Nagapati si Javines nga may nasamaran sa mga rebelde bangod sila ang nakakita sang mga tinulo sang dugo sa mga routa nga ginpalagyuhan sang mga NPA.
