Natupok ang duha ka units sang heavy equipment matapos nga ginsunog sang ginaaligar mga miyembro sang Communist Terrorist Group-New People’s Army sa Purok Magboto, Barangay Cabia-an, banwa sang Candoni, Negros Occidental sang Sabado sang gab-i, Nobyembre 5.
Sa interview sang Bombo Radyo Bacolod kayPolice Major Ronald Santillan, hepe sang Candoni PNP, ginapatihan mga miyembro sang New People’s Army (NPA) ang nagsunog sa mga heavy equipment nga ginapanag-iyahan sang Silver Dragon Construction Incorporated.
Suno kay Santillan, wala na sila nakakadto sang Sabado sang gab-i sa lugar sang insidente bangud sa mabudlay nga dalan, sabaylo nagpatigayon lamang ang mga ini sang checkpoints kaupod ang mga katapo sang Philippine Army.
Apang kahapon sang aga na, matapos nga makakuha sila sang clearance nagikan sa Philippine Army, ginpadulungan nila ang lugar kun sa diin ginsunog ang mga heavy equipments.
Santo sa imbestigasyon sang Candoni Municipal Police Station, duha ka units sang heavy equipments nga ginalakipan sang isa ka unit sang backhoe kag isa ka unit pison ukon road roller nga natupok na.
Nakita man ang duha pa ka units sang heavy equipments nga nagkalabuka ang windshield matapos nga ginlampusan.
Ginabanta nga indi magnubo P12 million ang balor sang nasunog nga heavy equipments.
Suno kay Santillan, ang mga suspetsado ang ginaaligar nga mga miyembro sang Communist Terrorist Group bangud santo sa ila imbestigasyon may isa ka armado antes maglakat naghambal nga katig-a sang ulo sang amo niyo.
Suno kay Santillan, ginalantaw nga motibo amo ang mahimo nga nagpangayo sang revolutionary tax apang wala naghatag ang tag-iya sang nasambit nga kompaniya.
Apang nagapadayon sa karun ang imbestigasyon sang kapulisan sa motibo sa likod sang nagluntad nga krimen.
