Duha ka mga high ranking official sang New Peoples Army kag duha ka mga regular nga miyembro sang New People’s Army ang nagsungka sa Philippine Army kag sa mga kapulisan sa Siaton, Negros Oriental.
Sa interview sang Bombo Radyo Bacolod kay 1LT Rogem Pearl Lanuza, Civil Military Operation Officer sang 11th Infantry Battalion, Philippine Army, sang Decemeber 18, nagsungka ang duha nga lunsay nagabusong kun sa diin isa diri ang 23 anyos kag lima ka bulan na nga nagabusong samtang isa ang 28 anyos kag siyam ka bula na nagabusong kun sa diin natalana nga magabata subong nga bulan.
Ang mga babayi ang ginkilala nga sanday Sarah bilang miyembro sang Squad 3 kag Taxation Team, samtang si Aubrey ang nagaserbe nga miyembro sang Educational and Finance Staff, kasubong man assistant political officer,kag ang mga ini ang kabahin sang South East Front sa idalom sang supervision sang Komiteng Rehiyonal Negros/Cebu/Bohol/Siquijor.
Samtang sang December 17, nagsungka ang duha ka mga remnants sang South East Front nga ginkilala lamang sa pangalan nga Ka Delfin kag KA Bombo sa 11th Infantry Battalion Community Support Team sa Brgy.Milagrosa, Santa Catalina, Negros Oriental.
Suno kay Lanuza, ang duha ka mga nagabusong kaupod si Ka Delfin ang yara sa custody sang 11th Infantry Battalion samtang si Ka Bombo naman ang yara sa paghinakop sang 705th Company sang Regional Mobile Force Battalion 7 sa Sitio Katubahan, Brgy, Tayak sa banwa sang Santa Catalina.
Si Ka Delfin ang nagsurrender sang M16 assault rifle nga duha ka magazines nga may unod nga ammunition, isa ka rifle grenade kag ang bandoleer, samtang si Ka Bombo ang nagturn-over san caliber 38 revolver nga may ammunition.
Ang duha ka mga nagabusong ang ginpaidalom sa medical check up sa Lamberto Macias Memorial Hospital sa Siaton, Negros Oriental agud nga masiguro nga wala sang physical contact or abuso nga natabo sa mga nagsungka nga mga rebelde kag para man matsekyar ang sitwasyon sang ginabusong sang mga ini.
Suno kay Lanuza, ang apat ka mga rebelde ang ipaenrol sa Enhanced Comprehensive Local Integration Program agud nga makaavail sang government benefits.
