Duha ka mga kabataan ang nagmasakit bangod sa tuman ka damo nga langaw nga nagikan sa poultry farm sang Araco Poultry & Livestock Corporation sa Purok Panlalawigan, Barangay Lopez Jaena, banwa sang Murcia.
Sa interview sang Bombo Radyo kay Virgilio Labarite, Purok President, makapila na nga beses nga ginpacheck up ang iya duha ka apo matapos nga naglain ang pamatyag.
Suno diri, aga tubtob sa gab-i ang ila nga pag-antos sa mga langaw nga nagasulod sa mga puluy-an.
Sadto, suno sa purok president indi pa tuman gid ka damo ang mga langaw, apang humalin sang nakaligad nga binulan, gilayon lang nga nagdamo ang mga ini nga naga-apekto na sa mga pumuluyo.
Samtang, sa karun indi na madamo gid ang langaw sa area bangod sa padayon nga fogging kag pagpanglimpyo sang poultry farm.
Suno kay Paul Segbuan, lead supervisor sang poultry farm, sirado kag may blower sa palibot sang poultry farm apang ang langaw ang mahimo sa gihapon nga makalusot kag makagwa sa mga pwertahan.
Suno diri, ginatinguhaan sang Araco Poultry & Livestock Corporation nga masolbar ang problema apang posible nga nagduging ang mga langaw bangod sa harvest season sang paho kasubong man sang tig-ululan.
Aminado naman ini nga isa man sa posible nga rason amo nga bag-o na ang feeds nga ila gingamit kag ini ang gina-amag sang langaw.
Padayon naman ang house to house visit sang korposrasyon para magpatigayon sang fogging sa area kag paghatag sang fly paper trap sa mga residente.
