Natalana sa Miyerkules sa dason nga semana ang lubong sang duha ka mga bata nga napatay sa sunog nga nagluntad sa Barangay 1, Bacolod City.
Madumduman nga napatay sa sunog ang mag-utod nga anom ka tuig kag walo ka tuig sa sunog, nga ginalantaw tuga sang ginsindihan nga kandila bangod sa brownout.
Wala naman sa balay ang iloy, matapos nga ini ang nagbakal sang fastfood nga request sang ginagutom sini nga kabataan.
Sa karun ang bangkay ang nahaya sa chapel sang Purok Lison, Barangay 1 kag ang mga ini ang ilubong na diri sa ciudad sang Bacolod.
Una na nga ginpahayag ni Barangay 1 Punong Barangay Cesar Rellos, nga nagahatag sang P16,000 nga bulig ang Barangay, ginaproseso naman nila ang bulig gikan sa Department of Social Service Development, nagpadulong naman sa lugar ang mga personnel ni Mayor-elec Greg Gasataya agud maghatag sang bulig, kag asikasuhon man sini ang assistance gikan sa Office of the City Mayor.
Naghatag man sang bugas ang Office of the Vice President, kag ini ang ginhatag sang iloy sang mga kabataan sa ila nga lolo nga nakaangkon man sang 3rd degree burns sa pagtinguha kuntani nga masalbar ang iya mga apo.
Suno kay Rellos, may mga pribado nga indibidwal man nga nagacontact sa iloy agud maghatag sang bulig, apang nagaduhaduha ini sa pagbatun sang kwarta, bangod nagasakit ang iya balatyagon.
Pahayag ni Rellos nga gin-isa na lamang ang lungon sang duha ka kabataan, kag gintupad na lamang ang agot nga natam-an sa sunog sa lawas sang iya manong.
Ang amay sang mga kabataan ang gindala sang magulang sini sa banwa sang Murcia agud nga maatipanan bangud halos indi ini maestorya bangud sa natabo sa iya mga kabataan.
