Arestado ang duha ka mga persona nga nagpangawat sang mantika sa Bago City, Negros Occidental.
Sa interview sang Bombo Radyo Bacolod kay Police Lt.Col. Ariel Pico, Officer-in-Charge sang Bago City Police Station, duha ka mga kawatan ang nadakpan kasunod sang madasig nga pagresponde sang mga gindeploy nga bit patrollers sang Bago City Police Station.
Suno kay Pico, ang isa lamang ang una nadakpan nga nagpangawat sang isa ka galon nga mantika kag gintudlo sini ang kaupod sini nga nagaserbe nga look-out.
Suno diri, grupo ang mga ini kag ang modus ang nagahakwat sang mga inugbaligya kaangay sang container sang mantika.
Ginahakwat sang mga ini amat-amat palayo sa tag-iya tubtob nga indi na mulalungan nga wala na ang ginabaligya.
Natigayon nga madakpan ang nagkawat sang isa ka container nga mantika bangud madasig man nga nagresponde ang police nga ara sa lugar.
Ang suspek ang ginkilala kay Loky Tabligan, 28 anyos, residente sang Purok 3, Barangay Isio, Cauayan, Negros Occidental kag sa karun nagapuyo sa Purok Sun Flower, Barangay Poblacion, Bago City
Suno sa biktima nga si Jocely Velez, 47 anyos, kasado kag residente sang Barangay Mabini, Pulupandan, Negros Occidental samtang nagabantay ini sang iya ginabaligya nga utan nakita sini nga naglabay ang suspek samtang hakwat ang isa ka container nga mantika nga nagabalor sang kapin P1200 gani nagsinggit ini kag ginkomprontar ang suspek kag nagpangayo man gilayon sang bulig gani nacorner ang suspek.
Gilayon man nga nagresponde ang mga kapulisan sa area kag gin-aresto ang suspek nga natalana pasakaan sang nagakaigo nga kaso.
