Arestado ang duha ka lalaki nga na-aktuhan nga nagapangawat sang kable sang telecommunications company sa dalan Gonzaga, siyudad sang Bacolod ala-1:50 sang kaagahon kahapon.
Sa interview sang Bombo Radyo kay Police Staff Sergeant Ariel Dario, imbestigador sang Bacolod Police Station 1, samtang nagaroving ang ila patrol member, nakabaton sila sang tawag gikan sa security guard sang isa ka bangko nga may yara sang duha ka persona nga nagapangawat sang kable.
Arestado sanday Nico Basco kag Stephen John Villamil, lunsay yara sa legal nga pang-edaron.
Ginaalegar sang mga suspetsado nga sila ang indi kilalahay apang na-aktuhan ang mga ini nga nagapangawat sang kable.
Ang kable ang nagalaba sang kapin 50 metros kag ginabanta nga nagabalor sang P65,000.
Sa karun, yara na sa kustodiya sang Bacolod Police Station 1 ang mga suspetsado nga pagapasakaan sang kaso.
