Ginkumpirmar sang acting general manager sang Central Negros Electric Cooperative (CENECO)nga may duha ka kompaniya nga nagtanyag sang unsolicited proposal para sa Joint Venture Agreement (JVA) sa power cooperative.
Sa interview sang Bombo Radyo Bacolod kay Atty. Arnel Lapore, nabaton sang CENECO nagligad nga semana ang unsolicited proposal sang More Power kag Meralco sa diin handa mag-invest ang nasambit nga mga kompaniya sang katumbas sang 70 percent sang asset sang power coop para sa financial kag technical aspect sang operation.
Kasunod sini nagpaguwa sang resolution ang CENECO board para pangayuan sang approval nagikan sa National Electrification Administration (NEA) ang unsolicited proposal.
Sa tion nga maaprubahan sang NEA kag sa Annual General Membership Assembly (AGMA), mangin epektibo ang JVA apisar pa nga sa 20230 pa expire ang prangkisa sang CENECO.
Aminado naman si Atty. Lapore nga kinahanglan sang bulig sang CENECO apang indi last option ang privatization ukon JVA agod mapaayo pa ang operasyon kag serbisyo sang power coop.
Nagpanugyan man ini sa mga member consumers kag magtambong sa patigayunon nga electiion sang board members sa March 11 tubtob 18 kag ang sa AGMA nga patigayunon sa Mayo 28 subong nga tuig.
Samtang, nagapati ang convenor sang Power Watch Negros nga madugay na nga nagakinahanglan sang masaligan nga partner ang Central Negros Electric Cooperative (CENECO) agud mahatagan sang solusyon ang ginapangatubang nga problema sini kasunod sang duha ka kompaniya nga nagtanyag sang unsolicited proposal para sa Joint Venture Agreement (JVA) sa power cooperative.
Sa interview sang Bombo Radyo Bacolod kay Wennie Sancho, indi man sini lubos nga ginawelcome ang ginaluto nga JVA bangud ginpasa pa ini sa National Electrification Administration (NEA) kag nagakadapat lang nga hulaton ang mangin desisyon angot diri.
Suno kay Sancho, antes ini maghatag sang komento angot sa JVA tubtob nga madesisyunan kag maaprubahan sa NEA kag makita na ang terms and conditions sang JVA.
Suno diri sa terms and conditions mahibaluan kun ano ang tinutuyo kag para kay sin-o ini.
