Arestado ang duha ka mga lalaki kag nakumpiskar ang masobra P3.5 million nga balor sang suspected shabu sa drug buybust operation sang Bacolod City Drug Enforcement Unit sa Zone 5, Barangay Handumanan, Bacolod City alas-8:34 kagab-i.
Ang operasyon ang ginpatigayon sang City Drug Enforcement Unit sang Bacolod City Police Office (BCPO-CDEU).
Ginkilala ang mga nadakpan nga sanday, Levi Jun Tapang alyas Jerome, 29 anyos, single, residente sang Lucky Homes, Barangay Handumanan, Bacolod City; kag Raegil Alarcon, 30 anyos, single, wala sang trabaho kag residente sang Fortune Town, Barangay Estefania, Bacolod City.
Si Tapang ang ginakabig nga High Value Individual, apang wala sa listahan sang Barangay Anti-Drug Abuse Council (BADAC); samtang si Alarcon ang Street Level Individual kag nakaagi na preso bangud man sa iligal nga droga.
Narecover sa duha ang lima ka knot tied ukon nakabugkos nga transparent plastic bag kag walo ka heat-sealed transparent plastic sachet sang suspected shabu, lakip na ang buybust item.
Ang suspected shabu nga nakuha sa duha ang ginabanta nga may kabug-aton nga 520 grams kag may kabug-usan nga balor nga P3,536,000.
Si Tapang kag Alarcon ang preso karon sa Bacolod Police Station 10 kag natalana nga pasakaan sang kaso sa paglapas sang Sec 5 kag 11 sang RA 9165 ukon Comprehensive Dangerous Drugs Act of 2002.
