Nakilala na ang duha ka mga lalaki nga ginpatay sa sulod mismo sang awto sa Purok Lampirong, Barangay 2, Bacolod City kagab-i kun sa diin nakaluwas ang apat ka tuig nga bata nga babayi.
Sa interview sang Bombo Radyo kay Police Capt. Paul Vincent Pendon, station commander sang Police Station 2, ginkilala ang mga biktima kanday Dexter Bryan Ursos, 41 anyos, kasado kag residente sang 17th Lacson St. Barangay 4, Bacolod City; kag Fernando Mahipos, 39 anyos, kasado kag residente sang Purok Boulevard, Barangay 14 sini nga syudad.
Ginkilala si Mahipos sang iya mismo nga iloy nga si Elsie samtang si Ursos ang gintumod man sang iya pamilya kag ginkuha agud madala sa isa ka funeral home sa syudad.
Ginpahayag man nga anak ni Mahipos ang apat ka tuig nga bata nga yara sa back seat sang salakyan.
Narekober naman sa crime scene ang apat ka empty shell sang wala pa matumod nga kalibre sang armas kun sa diin nakita ang duha sa dalan kag apat sa sulod sang salakyan.
Sa pagpadulong sang Bombo News team, ginpahayag sang tawo sa palibot sang balay ni Ursos nga masami man ginadala sang biktima ang gray nga Mitsubishi Mirage nga guba ang bumper.
Ginapahayag nga nagatrabaho bilang broker sang real estate si Ursos santo sa identification card nga narecover sa crime scene samtang naganegosyo sang dressed chicken si Mahipos.
