Arestado ang duha ka mga persona matapos nanghold-up sang isa ka delivery van sa Hacienda Canman-ug, Barangay Batuan, La Carlota City sang Marso 29.
Sa interview sang Bombo Radyo kay Police Lt. Col. Lowell Garinganao, hepe sang La Carlota City Police Station, nagabyahe ang isa ka delivery van sang isa ka food enterprise sakay ang driver kag duha ka mga tripulante.
Ang driver sang van ang ginkilala kay Jujeboy Ulgasan, 45 anyos samtang ang duha ka mga tripulante amu sanday Albert Dela Fuente, 24 anyos, customer service sa isa ka food enterprise kag helper sini nga si Rey John Espolsor, 18 anyos.
Suno kay Garinganao, nagdulog sa Hacienda Canman-ug ang driver kag nagpadulong sa kampo agud magpangihi.
Samtang, ginpalapitan naman sang suspetsado nga ginkilala kay Jobert Arbillo ang duha ka mga tripulante, gintayaan sang armas luthang kag nagdeklarar nga hold-up.
Ginpamangkot sini ang duha kun diin ang kwarta kag ginpahayag sang mga ini nga yara sa likod sang panel van gani nagpadulong didto si Arbillo.
Pagbalik ni Ulgasan, ginhambalan ini sang duha ka mga tripulante nga dasigon ang pagpadalagan sang van bangud sila ang ginhold-up kag yara sa likod ang suspetsado apang mas ginhinay pa sini ang pagpadalagan sang salakyan kag liwat nga nagpundo.
Suno sa hepe, nagbalik ang suspetsado sa front seat kag naghambal nga wala sang kwarta sang likod sang van.
Nakit-an naman sini ang bag nga ginauyatan ni Dela Fuente kag sang nag-agaway ang mga ini.
Suno diri, natigayon nga napugos kag nagapos sang duha ka tripulante si Arbillo kag nagpangayo sang bulig sa naglabay nga tricycle agud magtawag sang pulis.
Gilayon nga nagresponde ang kapulisan kag natigayon nga naaresto ang suspetsado.
Ginkatingala naman nila kun ngaa nagpadulong ang driver sa likod sang panel van kag suno diri, siya ang nagapangita sang kawayan nga pwede ilampos sa suspetsado kag ginhaboy sini ang armas luthang sa katubuhan.
Apang nasapwan sang kapulisan ang armas nga naputos sa foil sa likod sang panel van gani sila ang nagconclude nga updanay si Arbillo kag Ulgasan sa pagpanghold-up sa mga tripulante.
Magapangatubang ang duha sang kaso nga Robbery, paglapas sa R.A. 10591 ukon Comprehensive Firearms and Ammunition Regulation Act kag pagbayolar sa Comelec Gun Ban.
