Patay ang duha ka lalaki nga nagaangkasanay sa motorsiklo matapos sila nakabunggo sa gutter sa Buri Rd., Barangay Mandalagan ciudad sang Bacolod takna alas-12:30 kaina sang kaagahon.
Ginkilala ang driver kay Mark Joshua Dalumpines, 23-anyos kag residente sang Fuerto Porferia, Barangay Mandalagan samtang ang backrider amo si Adrian Bacan, 24-anyos sang Greensville 1, Barangay Estefania.
Sa interview sang Bombo Radyo Bacolod kay P/Staff Sgt. Richard Dema-ala, imbestigador sang Bacolod Police Station 3, ginpahayag sini nga gina-usoy sang mga biktima ang east to west direction sang hinali lang nadulaan sang kontrol si Dalumpines kun sa diin nakabunggo ini sa gutter nga nagresulta sang paglabog nila sa naka-stock pile nga tamburong.
Bangud sa mabaskog nga impact, gilayon nga ginbawian sang kabuhi ang duha.
Suno sa mga nakakita, madasig ang dalagan sang motorsiklo.
Suno kay Dema-ala, gikan sa isa ka birthday party ang mga biktima sa Villa Lucasan.
Padayon pa nila karon nga ginahibalo kun nakainom ang mga ini.
Sa karon, yara na sa punerarya ang bangkay sang duha.
