Padayon pa nga ginabulong sa ospital ang duha ka mga persona nga napilasan matapos ang magtiruhay sa Brgy. Mansilingan, Bacolod City sang Hunyo 16.
Ginkilala ang mga biktima nga sanday Alyas Weny, 38 anyos, kasado kag traysikol driver, ini ang nakaangkon sang pila sa tiyan kag si Alyas Loreto, 48 anyos, kasado, lalaki, laborer kag nakaangkon sang samad sa natuo nga dughan kasubong man sa nawala nga butkon kag lunsay mga residente sang BIR Compound, Barangay Mansilingan, Bacolod City.
Sa interview sang Bombo Radyo Bacolod kay Police Captain Dax Santillan, station commander sang Bacolod City Police Station 7, nagresponde ang mga ini sa isa ka subdivision sa Barangay Mansilingan matapos mabatun ang report sa shooting incident.
Suno kay Santillan, nakita sa lugar ang pila ka basiyo sang bala.
Ginpadulungan sang mga ini ang biktima sa ospital apang nagatinudluanay ang magtimbang nga bahin sa kun sin-o ang may kahimuan sang krimen.
Suno diri, hibaluon pa sang mga ini kun ano gid ang matuod paagi sa mga witnesses.
Ginpahayag man nga mahimo ang rason sang pagtiruhay sang duha ang bangud sa wala mabayaran nga utang.
