Ginderetso na sa Bureau of Jail Management and Penology (BJMP) ang duha ka mga high profiled suspects nga magapasulod kuntani sang tatlo ka kilo ukon balor P20.4 million nga suspected shabu sa Negros Island.
Madumduman nga natiklo sanday Aslanie Desomangcop Usman, residente sang Lopez Jaena St., Brgy. 31, Bacolod City kag Jalanie Mohammad Ambulo, residente sang Villa Angela Subdivision, Barangay Villamonte, Bacolod City kahapon sang hapon sa sulod sang Roll On Roll Off (RORO) vessel sa pagdungka sang barko sa Bacolod Bredco Port.
Ang duha ang natigayon nga madakop matapos nga madetect sang K-9 unit sang Philippine Coast Guard (PCG) Station Negros Occidental kag Philippine Drug Enforcement Agency (PDEA) Bacolod nga may iligal nga droga sa sulod sang compartment sang Toyota Corola Altis nga may plate number FHD 171.
Suno kay P/Capt Paul Vincent Pendon, station commander sang Bacolod Police Station 2, nga nakasakop sa Bredco Port, kaupod man ang mga ini sa nangin pagdakop sa mga suspetsado.
Kun sa diin nakumpiskar ang tatlo ka bulto sang suspected shabu nga nagabug-at sang tatlo ka kilo kag balor P20.4 million.
Ang iligal nga droga ang nasulod sa vaccume sealed nga chinese tea bag, nakawrap gamit angh masking tape kag nasulod sa yellow nga plastic bags.
Magluwas sa narecover nga suspected shabu, kalakip man sa ginkumpiskar ang isa ka cellular phone, mga IDs kag ang puti nga Toyota Corola Altis.
Santo sa impormasyon nga ginpakigbahin sang PDEA, nagikan sa Metro Manila ang mga suspetsado kag nagbyahe lang padulong sa syudad sang Bacolod agud nga idispose ang iligal nga droga sa lainlain nga mga syudad kag banwa sa probinysa sang Negros Occidental.
Suno kay Pendon, tumuron pa sang mga ini kun tumandok sa syudad ukon probinsya ang mga suspetsado, ukon nagpangayaw lang para sa iligal nga negosyo.
