Patay ang duha ka mga kabataan sa nagluntad nga sunog sa Barangay 1, Bacolod City pasado ala-1:30 sang kaagahon.
Sa interview sang Bombo Radyo Bacolod kay Punong Barangay Caesar Rellos Jr., ang mga napatay ang edad walo ka tuig nga lalaki kag anom ka tuig nga babayi.
Suno sa Punong Barangay, brownout sa nasambitan nga lugar halin alas-9:00 pa lamang sang gab-i, gani ginalantaw ang posibilidad nga kandila ang ginhalinan sang kalayo.
Ang iloy sang mga biktima ang naggwa naman agud magbakal sa fastfood, kag nabilin ang mga kabataan nga nagakatulog.
Ginapahayag man nga wala sa balay ang amay nga si Geb Gutierrez apang ini ang sa karun indi pa ma-estorya.
Suno sa Bacolod City Fire Station, alas-2:19 na nila nabatun ang tawag, kag gilayon man nga nakaresponder makaligad sang duha ka minutos.
Apang dako na ang kalayo, kun sa diin totally damaged gid ang balay, samtang ulihi naman nila nahibaluan nga may duha ka kabataan nga nabilin sa sulod.
Nakabulig naman nga wala naglapta ang kalayo sa bucket brigade sang mga residente sa lugar.
