Patay ang 29 anyos nga lalaki sa aksidente nga nagluntad sa dalan Araneta sakop sang Barangay Tangub, ciudad sang Bacolod kahapon sang kaagahon, Disyembre 24.
Ginkilala ang biktima sa kay Jessie Celedonio, 29 anyos kag residente sang Florenceville, Barangay Pahanocoy, ciudad sang Bacolod samtang ang driver sang IPM truck amo si Lowie Mahusga, residente sang ciudad sang Cadiz, Negros Occidental.
Sa interview sang Bombo Radyo kay Police Lt. Ramie Sayson, Officer-in-charge sang Bacolod Police Station 8, nagluntad ang insidente alas 3:00 ang takna kahapon sang kaagahon.
Suno kay Sayson, imbulbado sa aksidente amo ang driver sang motor nga Yamaha 150 kag ang driver sang dump truck sang IPM Construction and Development Corporation.
Suno diri, ang dump truck kag ang motorsiklo ang pareho nga padulong sa sur nga bahin gikan sa norte sa bahin sang dalan Araneta, Barangay Tangub kag suno sa imbestigasyon kag sa nakakita sang insidente, nag-overtake sa natuo nga bahin sang truck si Celodonio kag aksidente nga nabungguan sang nasambit nga dump truck.
Suno kay Sayson, sang pag-overtake sang biktima naalang-alang ini bangud nakita niya ang water pump gani nagluntad ang insidente kag bangud sa impact dead on the spot ang driver sang motorsiklo.
Mahimo nga ginyudyod pa sang truck ang biktima sang nagpreno ini.
Sa karun may yara na sang inisyal nga pagestoryahay ang pamilya sang biktima kag ang driver sang truck nga aksidente nga nakabunggo diri.
