Ginmanduan na sang Bacolod City Police Office director ang napulo ka Police Station nga mangin alerto sa mga makaduluda nga persona.
Ini kasunod sang duha ka makaduluda nga persona nga nagsulod kag nagalibot-libot sa area sang Bacolod Police Station 10.
Madumduman nga sang tinalikdan, may mga gina-alegar sightings sang armado nga grupo sa nasakupan sang nasambitan nga estasyon.
Sa interview sang Bombo Radyo Bacolod kay BCPO Director Police Col. Joeresty Coronica, sang Disyembre 29, may isa ka babayi nga kaangay nga nagapakuno-kuno nga buang nga hinali na lamang nagsulod sa Bacolod Police Station 10 sa Barangay Felisa.
Sang Enero 1, may isa naman ka lalaki nga karun lamang nasiplatan sa lugar nga nagalibot-libot.
Ini ang ila man nga gindala sa police station kag gin-imbestigaran.
Suno kay Coronica, ginakahangaw-an ang posibilidad nga may makawala nga grupo nga mahimo mag-atake sa mga police stations.
Narelease naman ang duha matapos ang ginpatigayon nga background ckecking.
Pasalig ni Coronica nga sila ang nagakoordinar sa mga local government units kasubong man sa Philippine Army tuhoy sa mga issue.
Ginpasanyog man nila ang preparasyon ukon station defense sang tagsa ka mga police stations.
