Ginpasakaan na sang kaso ang duha ka Malaysian national nga naaresto bangod sa pag-operar sang lovescam hub sa Barangay Singcang Airport, Bacolod City.
Sa interview sang Bombo Radyo Bacolod kay Police Major Justine Noel Josol, pinuno sang Bacolod City Criminal Investigation and Detection Group (CIDG), masobra tinuig na ang operasyon sang love scam hub.
Ang nadakpan ang makabig big boss nga 30 anyos kag 60 anyos, kun sa diin ang senior citizen ang madugay naman nga nagapuyo sa ciudad.
Narecover sa ginarentahan nila nga balay ang pila ka laptops nga ebidensya kag ang mga agents.
Suno kay Josol, nagadangat sa masobra 100 ang agents nga ginagamit sa love scam apang dyutay lamang ang naaktuhan bangod work from home ang kalabanan sa mga ini.
Ang mga agents ang ginatanyagan sang trabaho kag sweldo apang gamay lamang ang ila nga nagakabatun kag may ara pa sang penalties kun indi malab-ot ang qouta.
Magluwas sa agents, may ginhire man nga nagaserbe nga model kag ang litrato sang mga ini ang ginagamit agud maka-engganyo sang foreign individuals nga sarang mainto.
Ang mga ini ang ginahatagan man sang script nga ila ginagamit agud mapaluyag ang mga foreign nationals tubtob nga magsalig kag makwartahan.
Magluwas sa mga agents nga narescue kasunod sang operasyon, nga amo ang magaserbe nga complainant, may mga nagcontact naman sa ila nga iban pa nga biktima nga magapadulong sa CIDG office sa Lunes.
Buligan man sang mga ini sa paghimo sang affidavit ang mga biktima, kun luyag sang mga ini nga magfile sang dugang nga kaso.
Sa karun qualified trafficking pa lamang ang nafile kag ini ang non-bailable offense gani indi makapyansa ang mga suspect.
Iga-extract pa sang mga ini ang kaundan sang mga narecover nga laptops nga mahimo magamit sa pagfile sang cybercrime charges.
Padayun pa ang imbestigasyon sang CIDG, kag ginatumod pa ang mga co-conspirators kaangay sang mga nagamanage sang operations, nagserbe nga team leaders kag recruiters.
