Nasalbar ang duha ka mananagat matapos magkapan ang ila nga motor banca sa Barangay Punta Tagda, Hinigaran.
Sa interview sang Bombo Radyo Bacolod kay Petty Officer First Class Dave Guevara, acting commander sang Philippine Coast Guard – Hinigaran, ang duha ka mananagat nga sanday Jeffrey Hernandez, 31 anyos kag Armando Flores Norbe, 60 anyos lunsay mga residente sang Sitio Punta Tanulo, Barangay Pilar, Hinigaran, ang naglayag alas-5:00 kaina sang kaagahon agud mangasag.
Sila ang nagkumpyansa bangod makanay pa ang dagat.
Apang kapin alas-7:00 sang aga, hinali nga nagmadlos ang hangin kag nagtaas ang mga pagbalod.
Bangod sa paghampak sang hangin kag matag-as nga balod, nagkapan ang ila nga motor banca kag ang duha ang nagpatong na lamang sa likod sini.
Bangod kapin 100 metros lamang ang kalayuon sang motor banca, ini ang makita man sa takas gani nahimo nga marescue sang Philippine Coast Guard kag Hinigaran Municipal Disaster Risk Reduction and Management Office.
Ang duha ka biktima ang gilayon man nga gindala sa Hinigaran Rural Health Unit agud matsekyar ang ila nga kahimtangan.
