Ginkumpirmar sang public information officer sang 62nd Infantry Batallion sang Philippine Army nga yara na sa kustodiya sang Deparment of Social Welfare and Development (DSWD) ang duha ka mga menor-de-edad nga nalakip sa tatlo ka mga gina-alegar miyembro sang New People’s Army nga narescue sa natabo nga engkwentro sa Sitio Maluy-a, Barangay Sandayao, Guihulngan City, Negros Oriental nagligad nga Agosto 14.
Sa interview sang Bombo Radyo Bacolod kay Army Capt. Raymond Jamisal, ginpahayag sini nga magluwas sa bangkay sang NPA member nga si Rickim Remasog, 21-anyos kag residente sang Barangay Luz sa amo nga ciudad nga napatay sa engkwentro, narescue man utod sini nga si Rennel Remasog, 20-anyos kag duha ka mga babayi nga naga-edad 15 kag 17-anyos.
Ginapatihan nga nobya sang napatay ang isa sa mga menor-de-edad.
Suno kay Jamisal, yara na sa kustodiya sang DSWD ang duha ka mga minors.
Dugang pa sini nga bag-uhanon lamang ang mga narescue sa communist terrorist group.
Ginagamit ang mga ini bilang suluguon ukon courrier sang makawala nga grupo.
Gina-imbestigaran pa karon sang militar ang posibilidad nga ginhimo nga sex slaves ang duha.
Suno kay Jamisal, nagapadayon karon ang pursuit operation sang tropa sang gobyerno batok sa mga nagpalagyo nga miyembro sang NPA.
Madumduman nga isa ang patay samtang duha naman ka mga suldado ang pilason sa nagluntad nga dungan nga engkwentro sa Sitio Maluy-a kag Sitio Tabago sa amo nga barangay.
