Ginpahayag sang spokesperson sang Special Investigation Task Group-Degamo nga lima lang ka mga suspetsado nga may kaangtanan sa pag-assassinate kay Negros Oriental Roel Degamo ang napasakaan na sang kaso nga frustrated murder.
Suno kay Police Lt. Col. Gerard Ace Pelare, may yara sang mga naaresto sa gwa sang SITG-Degamo gani nagacoordinate sila sa arresting unit agud nga mahibaluan kun ini ang kabahin sang ginapatigayon nga hot pursuit operation sa pagpatay sagobernador kag walo ka iban pa.
Suno kay Pelare, samtang nagalakat ang inadlaw may iban pa nga mga biktima nga nagapabilin sa ospital kun sa diin ginapakig-angutan man sang mga otoridad agud nga makumpleto na ang tanan nga mga complaints agud nga maforward sa Department of Justice.
Ginpahayag man sini nga lima sa 13 ka mga pilason nga mga biktima ang nagakahatag na sang affidavits kag gin-attach ini sa ginpasaka nga kaso sang DOJ nga frustrated murder batok sa mga suspek.
Samtang duha naman sa mga suspek ang gindala sang National Bureau of Investigation kag nakuhaan na sang extrajudicial confessions.
Suno kay Pelare, nakatutok ang Special Investigation Task Group-Degamo sa relentless operation agud nga madakpan ang napabilin pa nga suspetsado sa PAMPLONA MASSACRE kag gwa na ang mga ini sa decision ni Interior Secretary Benhur Abalos sa pagrelieved sang mga kapulisan sa Negros Oriental kasunod sang assasination sang gobernador.
Samtang dako sagihapon ang ila nga pagpati nga ang mga nabilin nga suspek ang yara sa gihapon sa Negros Oriental.
Gintudlo sang mga suspetsado sa pagpatay kay Negros Oriental Governor Roel Degamo nga ang mastermind ang isa ka prominente nga persona sa ila nga extra-judicial confessions.
Nahibaluan nga ginpahayag nanday Joven Javier kag Osmundo Rivero, duha sa mga naaresto nga suspetsado, nga ang mastermind sa pagpatay ang nagagamit sang middleman nga ginkilala lamang nga si “Marvin”.
Dugang pa sang mga ini nga sila ang may apat ka plano agud mapatay ang gobernador nga ginalakipan ang ambush, pinaagi sa sniper, pagbangga sa gobernador sa paglibot sini sa iya nga mga nasakupan kag ang ulihi, amo ang pag-atake diri sa iya mismo nga puluy-an.
Madumduman nga sang Sabado, ginsulong sang mga gunmen nga armado sang mga high-powered rifles ang balay ni Governor Degamo kag ini ang ginpatay kaupod sang walo ka sibilyan kag pagkasamad sang iban pa nga yara sa compound.
Sanday Javier kag Rivero, ang nahibaluan nga mga anay suldado.
Nagpasalig na si Javier sang iya nga intensyon sa pagbuyagyag sang tanan niya nga nahibaluan natuhoy sa pagpatay sa gobernador, samtang naghingyo man ini nga maproteksyunan ang iya nga pamilya.
Sa pihak nga bahin, ginpahayag naman ni Rivero nga wala siya gintanyagan sang kwarta para makigbahin sa assassination, sa baylo ginpahog ang iya nga pamilya.
