Duha ka mga bangkay sang lalaki ang nasapwan sa higad sang dalan sa Purok Talutog, Barangay Dulao, ciudad sang Bago, Negros Occidental kaina sang aga.
Sa interview sang Bombo Radyo Bacolod kay Jacinto Rosquillo, tanod commander sang Barangay Dulao, ginpahibalo lamang siya sang nagabuhi sang bibe nga may yara sang nasapwan nga duha ka bangkay sang lalaki sa higad sang dalan kag nagadasok sa kabulakan.
Gilayon man sini ginpadulungan kag ginpahibalo ang barangay angot sa nakita nga bangkay sang duha ka mga lalaki.
Suno kay Rosquillo, indi maathag ang nawong sang duha bangud lunsay naputos sang masking tape ang ulo, nabaklid ang mga kamot kag ginhigtan man sang masking tape ang mga tiil sang mga ini.
Ang mga biktima ang lunsay nagasuksok sang itom nga t-shirt samtang magkatuhay naman ang shorts bangud ang isa ang nagasuksok sang itom samtang ang isa naman ang puti nga jersey shorts.
Suno kay Rosquillo, una ini nga bes nga ginhal-idan sang bangkay ang ila nga lugar.
Ginalantaw nga nagikan sa iban nga lugar ang mga biktima bangud wala man sang reported nga missing sa Purok Talutog.
Suno sa tanod commander, mahimo nga alas-2:00 na sang kaagahon ginbilin ang mga bangkay bangud mga ala-1:00 ang takna sang kaagahon, nagroving pa sila kag wala man sila sang nabatian nga lupok sang armas-luthang.
Samtang, suno naman kay alyas Nonoy, nakita lamang sini ang mga biktima samtang nagabantay sang bibe gani nagtawag ini sang barangay tanod kag ginpahibalo sa barangay agud nga matawgan sang mga pulis sang Bago City Police Station.
Sa interview sang Bombo Radyo Bacolod kay Police Staff Sergeant Armando Arao, imbestigador sang Bago City Police Station, alas-9:10 ang takna kaina sang aga sang napahibalo sila angot sa nasapwan nga bangkay kag indi na maathag ang nawong bangud lunsay napalibutan sang masking tape ang ulo.
Nagapanawagan si Arao sa mga pumuluyo nga may himata nga wala makapauli ukon missing nga makig-angot lamang sa Bago City Police Station agud nga mabuligan sa paghatag sang identity sang duha ka mga lalaki.
Suno kay Arao, ang isa ka biktima ang may yara sang tattoo sa nawala nga bahin sang abaga.
Ginalantaw nga sa iban nga lugar ginpatay ang biktima kag ginhal-id lamang sa lugar.
Wala man sang nakapablotter sa Bago City Police Station sang mga namissing nga mga residente.
