Nakabalik na sa pagtrabaho sa Silay City Government ang duha ka mga empleyado nga nagpositibo sa ginpatigayon nga surprised drug test tinalikdan nga tuig.
Ini bangod sila ang nakatapos na sa rehabilitation kag validation.
Sa interview sang Bombo Radyo Bacolod kay Police Lt. Col. Mark Anthony Darroca, hepe sa Silay City Police Station, ang duha nga mga nakabalik sa trabaho ang ginalakipan sang isa ka traffic enforcer kag isa ka regular employee nga nagatrabaho sa Municipal Hall.
Paathag ni Darroca sa kapin 100 nga mga casual kag regular employees nga nagpositibo gikan sa nagkalainlain nga opisina, duha pa lamang ang nakatapos sa Community Based Drug Rehabilitation Program.
Suno diri, 70 porsyento ang willing man nga magpaidalum sa rehabilitation apang wala pa ang iban maschedule bangod si Darroca ang nareshuffle sa iban nga designation bangod sa 2023 Barangay and Sangguniang Kabataan Elections nga gindugangan pa sang kakulangan sa pondo.
May iban naman nga wala na sang plano nga magbalik pa sa kapitolyo kag nagpangita na lamang sang iban nga trabaho.
Pasalig naman ni Darroca nga magapadayun ang pagpatigayon sang surprised drug test apang ini ang himuon na lamang nga targeted.
Ini bangod sa pagmahal sang test kits, gani sila ang magapili na lamang sang random nga departamento nga ipaidalum sa drug test, samtang may-ara naman sila sang listahan sang mga indibidwal nga gina-alegar nagagamit sang iligal nga droga.
Suno kay Darroca, subong nga 1st quarter, una sang mga ini nga idrug test ang mga head officers kalakip na sa Office of the Mayor kag Sangguniang Panlungsod.
Ginapakamaayo naman sang hepe nga nagakooperar kag wala ginatolerar sang alkalde ang illegal nga buluhaton.
