Patay ang duha ka mga empleyado sang Cadiz City hall matapos nga nahulog sa taytay nga ginakay-o sa nasambit nga syudad ang ila ginamaneho nga motorsiklo.
Sa interview kay Police Major Robert Mansueto ang hepe sang Cadiz PNP, ginkilala ang mga biktima nga sanday Archie Razo, 35 anyos kag na-assign sa environmental city office kag si Armando Cardinal nga na-assign naman sa Department of Education Division Office.
Base sa imbestigasyon sang Cadiz PNP, ang duha ka mga biktima ang impluwensyado sang makahulubog nga ilimnon bangod nagikan sila sa isa ka okasyon.
Suno kay Mansueto, sang didto na ang mga biktima sa Oso bridge, posible nga wala natalupangdan sang driver nag buho sa taytay.
Nahibaluan nga apisar may yara sang signage, madulom ang lugar.
Naghingyo naman si Mansueto sa local government unit nga mabutangan sang street lights ang area agud indi na masulit ang nasambit nga insidente.
Base man sa mga nakakita suno kay Mansueto, wala sang headlight ang ila nga motor kag sila ang naggamit lamang sang pinlight.
Bangod sa na-agum nga patal nga pilas, dead on the spot ang nasambit nga mga biktima.
