Duha ka mga estudyante sang Technological University of the Philippines-Visayas ang nakasulod sa top 10 sang Chemical Technicians Licensure Examinations.
Sa interview sang Bombo Radyo kay Geicel Osano Salaya sang Victorias City, nga top 3 sa Chemical Technicians Licensure Examinations, una sini nga nakita nga yara na ang result sang board exam kag nakita sini ang iya pangalan sa lista sang passers apang natingala ini kun ngaa madamo sang naga-congratulate sa iya kag didto na sini nahibaluan nga siya ang yara sa top 3.
Suno diri, sa tuman niya nga kalipay wala na sini napunggan pa nga maghibi.
Pahayag ni Salaya, disiplina sa kaugalingon nga magtuon ang iya ginhimo amo nga sa karun ang anay handum niya ang iya nakuha.
Dako ang pagpasalamat sini sa TUP-V nga naghasa sa ila, nga kun indi bangod sa mabudlay nga quiz kag exams, indi mangin mahapos sa ila ang board exam.
Samtang, indi lamang Chemical Technicians Licensure Examination ang napasaran sang nagtop 4, apang iya man napasaran ang Chemist Licensure Examination.
Sa interview sang Bombo Radyo kay Razelyn Joy Giamal sang Talisay City, Disyembre 13 kag 14 ginpatigayon ang Chemist Licensure Examination kag Disyembre 15 naman ang Chemical Technicians Licensure Examination.
Suno diri, luyag gid sini nga mangin Chemist amo nga ginpili sini ang kurso nga Bachelor of Science in Chemistry.
Wala naman nakabatayag sang pressure si Giamal gikan sa iya ginikanan kag sila ang todo suporta sa iya pag-eskwela.
Ang Technological University of the Philippines-Visayas ang nagpanguna sa top performing school sa Chemical Technicians Licensure Examinations nga may yara sang 100 percent passing rate.
