Padayun ang manhunt operation angot sa duwa ka mga priso sa Negros Occidental District Jail nga nagpalagyo kahapon sang kaagahun.
Ang duwa ka detainee ang ginkilala kanday Jimmy Sablon, residente sang Barangay Robles, La Castellana, Negros Occidental nga may kaso nga frustrated murder kag si Ramonito Ventura, residente sa Barangay Buenavista, Murcia, Negros Occidental nga may kaso nga robbery.
Nagpalagyo sa likod nga bahin sang prisuhan ang mga priso pinaagi sa pagsaka sa pader, pag-utod sa grills kag paggamit sang malong agud nga makagwa.
Ang duwa ang nakahunong sa magkatupad nga dormitoryo sa room 22 kag 23.
Nahibaluan nga bangod yara sa modified lockdown ang district Jail, 15 lamang ka mga personnel ang naga-operate sa kabug-usan, apang lima lamang ang nakaduty sa amo nga tinion.
Wala naman makuhaan sang CCTV footage ang pagpalagyo kag padayun pa nga ginahibalo kun ngaa wala natalupangdan sang mga nakaduty nga BJMP personnel.
Nagakoordinar naman ang BJMP sa mga counterparts sa iban nga ciudad kag kabanwahanan, mga Barangay ilabi na sa orihinial nga address sang mga ini agud nga matumod kun nakapauli ang mga pugante.
May mga lead naman nga ginasundan ang mga otoridad kag igatsekyar kun yara sa lugar ang mga nakapalagyo nga priso.
Wala naman sang nabaton nga impormasyon natuhoy sang plano nga pagpalagyo santo sa information gathering nga ginpatigayon, samtang indi man maghimata ang mga nagpalagyo.
Sa karun, magapaidalum man sa verification kun may salabton ang mga nakabantay nga mga pulis agud mahibaluan kun magapangatubang ang mga ini sang administrative case.
P10,000 naman ang gintalana nga reward sa mga makatudlo sa kada isa sa mga suspetsado.
