Arestado ang tatlo ka mga persona sa drug buybust operation nga ginpatigayon sang Philippine Drug Enforcement Agency sa Vendors Plaza, Brgy 12, Bacolod City.
Suno kay Agent Bamboo, Assistant Provincial Officer sang PDEA, nadismantle ang drug den kag naaresto sanday Benjie Despu, 37-anyos, residente sang Brgy. Singcang Airport; Remia Espartero, 56-anyos, residente sang Brgy. 12; kag Jay-c Dale, 35-anyos; residente sang Barangay Alijis.
Nakuha sa ila paghinakop ang napulo ka gramos sang suspected shabu nga nagabalor P68,000.
Ginakabig naman nga high impact ang operasyon.
Sa karun nakahunong na ang mga suspetsado. SAMTANG, arestado ang mag-tiyo sa siyudad sang Silay sa drug buybust operation nga ginpatigayon sang Silay City Police Station sa Purok Riverside, Barangay Hawaiian, Silay City.
Ang mga suspetsado ginkilala nga sanday Joshua Ocido, 23 anyos, ginakabig nga number 7 priority sang kapulisan kag ang tiyo sini nga si Henry Palmon, 40 anyos, lunsay mga residente sang nasambit nga lugar.
Nakumpiskar sa duha ang anom ka heat sealed transparent plastic sachet sang suspected shabu nga may kabug-aton nga 13 ka gramo kag standard drug price nga P88,400.
Sa karun yara na sa kustodiya sang kapulisan ang duha ka mga suspetsado nga magapangatubang sang kaso nga violation sang Republic Act 9165 ukon Comprehensive Dangerous Drugs Act of 2002.
