Nafile na sa prosecutor’s office ang kaso batok sa duha ka mga suspetsado sa pagpasulod sang balor P20.4 million nga iligal nga droga nga nakumpiskar sang Lunes sa RoRo vessel nga nagdungka sa Bredco Port.
Suno kay Philippine Drug Enforcement Agency (PDEA) Region 6 Director Alex Tablate, ang kaso ang ginatutukan sang PDEA bangod indi simple nga player sa iligal nga droga ang nadakop.
Ginatinguhaan man sang ahensya nga matumod ang ginakuhaan sang mga suspetsado sang iligal nga droga nga suno sa PDEA Director indi basta-basta nga personalidad ilabi na nga makasarang maghatag sang tuman ka dako nga supply sang shabu.
Madumduman nga nadakop sanday Aslanie Desomangcop Usman, residente sang Lopez Jaena St., Brgy. 31, Bacolod City kag Jalanie Mohammad Ambulo, residente sang Villa Angela Subdivision, Barangay Villamonte, Bacolod City ang tatlo ka kilo sang shabu nga nagabalor P20.4 million.
Ini ang natukiban matapos nga napanimahuan sang K-9 dogs sang Philippine Coast Guard (PCG) Station Negros Occidental kag PDEA Bacolod ang shabu nga nakatago sa compartment sang puti nga Toyota Corola Altis.
Pasalig naman sini nga pasanyugon pagid sang PDEA, PNP kag iban pa nga operating units ang mga operasyon batok sa iligal nga droga sa Western Visayas ilabi na sa mga Airports kag Seaports.
Aminado naman ini nga may kabudlayan ang pagdakop bangod tuman ka damo sang isla sa Pilipinas.
Dako man ang papel sang mga K-9 Dogs sa mga operasyon ilabi na ang mga ini ang nagabulig sa pagrecover sang mga dalagko nga kontra bando kaangay sang natabo sang Lunes.
Paathag ni Tablate nga parehas nagpungko ang ido sang PCG kag PDEA nga nagapatimaan nga may nasimhutan ang mga ini nga iligal nga droga.
Kahapon sang aga, nakumpirmar sang mga ini nga shabu ang mga narecover gikan sa duha ka muslim.
Ang duha ka suspetsado ang lunsay nakahunong na sa Bureau of Jail Management and Penology (BJMP).
Ang ginfile nga kaso ang ginalakipan sang Section 26 (conspiracy) in relation to Section 5 (transportation) kag section 11 (possession) sang Republic Act 9165 ukon Comprehensive Dangerous Drugs Act of 2022.
