Lunsay nakaangkon sang napulo ka mga igo sang bala sa lawas ang duha ka mga persona nga nagbayluhanay sang luthang sa Campoquino Resort, Barangay 4, Sipalay City sang Hulyo 10.
Madumduman nga lunsay ginbawian sang kabuhi sanday Garry Labrador, 46 anyos kag residente sang Barangay Ma-ao, Bago City kag Fernando Silanga, 46 anyos, residente sang Lower Bicutan, Taguig City, Metro Manila.
May ginapatigayon nga team building sa resort sang ginsaway ni Silanga si Labrador bangud nagapasaway ini kag hubog.
Naglakat si Labrador kag pagbalik sini, hinali lang niya nga gintiro si Silanga kag nakabalos man ang biktima.
Narecover sa crime scene ang .45 calibre pistol kag 9mm.
Sa interview sang Bombo Radyo kay Police Major James Latayon, hepe sang Sipalay City Police Station, ginpahayag sini nga nakagwa na ang resulta sang post mortem examination sang duha kun sa diin lunsay sila nakaangkon sang napulo ka mga igo sang bala sa lawas.
Suno diri, si Labrador ang nagikan sa Manila samtang si Silanga naman ang isa ka anay personnel sang Philippine National Police kag nangin imbolbado sa carnapping sadto.
Sa karun padayon pa nga ginahibalo sang kapulisan ang dugang nga background sang duha ka mga persona.
