Wala pa natumod ang suspetsado ukon mga suspetsado nga nagluthang-patay sa isa ka lalaki sa banwa sang Toboso kahapon.
Nagapangahoy lamang ang biktima nga si Dondon Blanco, 32-anyos sang Brgy. Isidro sang ini ang ginluthang, las-3:30 sang hapon.
Pilas sa likod ang naangkun sang biktima nga gintunaan sang gilayon sini nga kamatayon.
Samtang, wala pa man natumod sa karun ang motibo kag suspetsado sa pagluthang-patay sa isa ka mangunguma sa banwa sang Moises Padilla.
Mga 1:30 sang hapon tinalikdan nga Sabado samtang nagalakat pauli ang biktima nga si Johnny Castelo, 47-anyos sang Sitio Nakuruhan, Brgy. Quintin Remo upod sa iya live-in partner nga si Erlinda Las sang ini ang ginbanggaan sang suspetsado kag hinali nga ginluthang.
Nakaangkun sang pilas sa ulo kag magtimbang nga tiil ang biktima nga nagresulta sa iya gilayon nga kamatayon.
Narekober sa crime scene ang apat ka empty shells sang 9 mm pistol kag 45 caliber pistol.
