Duha ka mga kalalakin-an ang padayun nga ginabulong matapos ginluthang sa duha ka magkatuhay nga banwa sa probinsya sang Negros Occidental.
Ang isa sa biktima ang ginkilala kay Ricky Canoy samtang ang suspetsado amo ang iya abyan nga si Noli Villamor lunsay mga residente sa Barangay San Isidro, Toboso, Negros Occidental.
Santo sa imbestigasyon sang Toboso Municipal Police Station, nagalakat na kuntani pauli si Canoy sang siya ang ginhagad sang suspetsado nga mag-inom sang makahulubog nga ilimnon.
Apang sang sila ang naga-inom, nagluntad ang pagba-isay sa tunga sang duha tubtob sa gintiro ni Villamor si Canoy nga naigo sa iya nga tiil.
Gilayon naman nga gindala sa ospital sang banwa ang biktima agud madapatan sang nagakaigo nga pagbulong.
Nahibaluan nga wala man sang daan nga hiligut-anon sa tunga sang duha, gani ginalantaw nga ang natabo nga pagpangluthang ang tuga lang sang kahulugbon.
Sa pihak nga bahin, ginabulong man sa karun sa ospital ang isa ka lalaki sa banwa sang Hinobaan matapos nga ini ang tiruhon sang iya nga tiyo.
Ang biktima ang ginkilala kay Alex Dequiña, residente sa Barangay San Rafael, Hinobaan, Negros Occidental samtang ang suspetsado ang ginkilala kay John Leslie Meñesco.
Sa inisyal nga imbestigasyon sang Hinobaan Municipal Police Station, nagapungkuon ang biktima sang ini ang hinali nalang nga ginluthang sang iya nga tiyo gamit ang cal. 45 pistol.
Si Dequiña ang nakaangkon sang pilas sa nawala nga paa, nga gilayon naman nga ginhingagaw sa ospital para sa pagbulong.
Nahibaluan nga may-away sa tunga ni Meñesco kag amay ni Dequiña, gani ginalantaw nga tuga sang kainit sang suspetsado, ini ang nagbalos sa iya nga hinablos.
