Nakilal-an na ang duha ka mga miembro sang New People’s Army (NPA) nga napatay sa engkwentro sa tunga nila sang 62nd Infantry Battalion sa Sitio Agpapatao, Brgy. Binobohan, Guihulngan City, Negros Oriental pasado alas 6:00 sang gab-i sang Pebrero 28.
Ginkumpirmar ni Colonel Inocencio Pasaporte, commander sang 303rd IB, nga ang mga napatay ang ginkilala nga sanday Edgar Bonifacio sang Sitio Kalabasa kag Randy Calumay sang Sitio Bulalacao sang Brgy. Binobohan, Negros Oriental.
Suno kay Pasaporte, ginpahayag sang mga residente sa lugar nga madugay na nga mga miembro sang NPA ang duha.
Nahibaluan nga ang duha ang miembro sang Special Partisan Unit (SPARU) ukon ang mga ginakabig tirador sang grupo.
Gindugang pa sang army commander, nga ang grupo man sang biktima ang nagpatay sa amay sang isa ka rebel returnee sang sini lang nga bulan sang Pebrero kag sa isa ka anay Citizen Armed Force Geographical Unit (CAFGU) member sa ciudad sang Canlaon, Negros Oriental.
Madumduman nga nagluntad ang engkwentro matapos nga nagsugat-anay ang duha ka grupo kag nagbayluhanay sang luthang nga naglawig sang kapin 10 minutos.
Narekober sa encounter site ang duha ka .45 calibre pistol; isa ka .38 calibre pistol; apat ka .45 calibre magazine nga may mga live ammunitions; .38 calibre ammunitions; improvised shotguns kag mga dokumento.
