Patay ang duha ka persona matapos mabungguan sang isa ka truck ang tricycle sa National Highway sa Crossing Busay, Barangay Punta Mesa, Manapla, Negros Occidental.
Sa interview sang Bombo Radyo Bacolod kay P/Maj. Jaynick Bermudez, hepe sa Manapla Municipal Police Station, parehas ang banas sang tricycle nga ginasakyan sang pito ka persona kalakip na ang driver kag sang Isuzu truck nga kargado sang manok nga gikan sa Cadiz City padulong sa banwa sang Manapla.
Apang pagdangat sa Crossing Busay, namiscalculate sang truck driver nga si Rogelio Paunilan Jr., 30 anyos, residente sa Baranay Tabun-ac, banwa sang Toboso ang pagmaneho sini gani nabungguan niya ang ginasundan nga tricycle nga ginadala naman ni Randy Fuentes, 50 anyos.
Bangod sa impact nadulaan sang control ang tricycle kag nagtabok sa pihak nga lane tubtob sa nakabunggo sa railings sang dalan nga nagresulta sa pagkahulog sang mga pasahero.
Ang mga pasahero ang ginalakipan nanday Jovi Ann Arcenal, 21 anyos; Alyssa Mae Ybañez, 22 anyos; Maribel Ybañes, 45 anyos; Samantha Grace Gumban, kasubong man ang 14 anyos nga babayi kag 9 anyos nga lalaki.
Apang matapos nga maka-angkon sang head injury, si Maribel Ybañez ang gilayon nga nadulaan sang kabuhi.
Ang 14 anyos nga babayi ang gin-admit naman sa ospital bangod man sa head injury apang ini ang ginbawian sang kabuhi kasunod nga adlaw.
Ang driver sang truck ang ginrelease naman sang Murcia Municipal Police Station matapos maglapse ang reglimentary period kag ginalantaw nga regular filing nalang inkaso nga magdesidar nga magpasaka sang kaso ang mga biktima.
Natalana pa nga mag-estoryahanay ang duha ka kampo apang hinali nga dayunon ang kaso, ang driver ang mangatubang sang 2 counts sang Reckless Imprudence Resulting to Homecide.
