Ginpahayag sang isa sa nurse nga nakaupod sa ginpatigayon nga entrapment operation sa nagabuhat sang peke nga vaccination card kag travel certificate sa down town area sa syudad sang Bacolod kahapon sang hapon nga ini ang nag-umpisa sang duha ka mga kapulisan ang nagdangop sa ila agud ipaverify kun genuine ukon peke ang isa ka vaccination card.
Suno kay Christopher Mayang, nurse nga nakastation sa COVID-19 vaccination program sa Ayala Capitol Central, nga nagpalapit sa ila kapin alas-2:00 sang hapon ang duha ka police personnel kag ginpakumpirmar kun lehitimo ang isa ka vaccination card.
Didto man sang mga ini natumod nga peke ang vaccination card bangod may isa ka hospital personnel nga nakapirma sa vaccination card ang sala ang designation.
Suno diri, indi tanan nga nagapirma sa vaccination card ang doktor bangod may-ara man sang nurses.
Apang sa nasambit nga peke nga vaccination card, ang nurse ang naka-label nga doktor.
Dugang pa sini nga indi man amo ang mga pirma, lot number kag vial number nga nakabutang sa card.
Suno kay Mayang, wala naga-exist ang nasambit nga mga lot kag vial numbers.
Ginalantaw man sini nga may mga impormasyon na nga nabatun ang mga kapulisan kun sa diin ginapatigayon ang transaksyon sa pagbakal sang peke nga vaccination card.
Ang mga peke nga dokumento ang nahibaluan nga ginabaligya sa balor nga P500.
Suno kay Mayang, ginapinsar sang mga ini nga vaccination card lang ang ginapeke apang ginkakibot nalang sang mga ini sang natukiban sa entrapment operation nga bisan ang travel certificate ang ginapeke man.
