Natumba ang duha ka pulis sa ginasakyan nila nga motorsiklo matapos ginlagas ang riding in tandem nga naglusot sa checkpoint nga ginpatigayon sang Calatrava Municipal Police Station sa Barangya Lemery, banwa sang Calatrava sang Abril 22.
Ang duha ka PNP personnel ang ginkilala nga sanday Police Staff Sergeant Rex Bacan kag Patrolman Rofer Villanueva.
Sa intrerview sang Bombo Radyo kay Police Major Ronald Santillan, hepe sang Calatrava Municipal Police Station, samtang sila ang nagapatigayon sang checkpoint operation sa nasambit nga lugar ala- 1:10 sang hapon, may duha ka persona nga nagasakay sa motorsiklo nga wala nagpundo apisar nga ginparahan na ini sang mga kapulisan kag naglusot sa checkpoint area.
Ini ang nasaksihan nanday Bacan kag Villanueva gani gilayon nila nga ginlaot.
Apang, bangod nga may yara sang dalan nga ginakay-o sa bahin sang Sitio Dao, Barangay Lemery, wala natulupangdan sang kapulisan ang gamay nga hump sa dalan gani wala na sini nakontrolar ang motorsiklo kag natumba.
Nag-agom sang minor injuries ang duha ka pulis nga gindala sa ospital agud mahatagan sang nagakaigo nga pagbulong.
Samtang, wala na nalaot pa ang riding in tandem, apang narekober naman ang Black Honda TMX 155 motorcycle nga ginbilin sa kilid sang dalan bangod nga nautod ang kadena sini.
Suno kay Santillan, posible nga may dala nga kontrabado ang mga riders ukon wala sang lisensya.
Mensahe sini sa mga drayber nga maghalong kag magkooperar sa checkpoint bangod wala man ini nagadugay kag para ini sa safety sang kada isa.
