Yara na sa estable nga kondisyon ang duha ka katapo sang militar nga napilasan sa engkwentro batok sa mga miyembro sang CPP-NPA sa Sitio Sicaba, Barangay Gawahon, Victorias City, Negros Occidental kahapon sang aga.
Suno kay 303rd Infantry Brigade commander Col. Inocencio Pasaporte, yara sa ospital sa Bacolod ang mga napilasan apang wala na sini ginpahibalo ang pangalan sang ospital, pangalan sang biktima kag ranggo sang mga sini.
Nagapatigayon sang “community secure- self at home” nga programa ang 79th IB kag information dissemination nahanungod sa ginaatubang nga COVID-19 sang ila naengkwentro ang rebelde nga grupo.
Yara sa 10 tubtob 15 ka mga rebelde ang nakaengkwentro sang tropa.
Nagsugod ang engkwentro alas-8:30 sang aga kag nagresulta sa pagkapilas sang duha ka suldado.
Isa ka suldado ang naigo sa tiil kag ginalantaw nga may yara man sang naigo sa bahin sang NPA bangud sa dugo nga nakit-an sa ila gin-agyan sa pagpalagyo.
Nakuha sa encounter site ang pila ka improvised explosive devices (IED), mga bandoline nga naga-unod sang mga magazine sang MK57 kag M16 nga rifle, apat ka jungle packs, mga personal nga gamit, handheld radio kag binocular.
Suno kay Pasaporte, nagapadayon ang information dessimination sang militar sa urban area pinaagi sa pagpalibot sang speaker nga nagapahanumdom nahanungod sa COVID-19 crisis.
Kasubong man nga ginakadtuan sang mga militar ang mga rural areas agud mapahanumduman.
Hugot naman nga ginapatihan ni Pasaporte nga asta lang sa istorya ang ginsambit sang spokesperson sang rebelde nga grupo nga nagapatigayon man sila sang information dissemination.
Kadungan sini, liwat nga nag-apela si Pasaporte sa mga miyembro sang NPA nga magbalik na sa sabak sang gobyerno bangud nakahanda ang militar nga sila ang batunon.
