Ginkumpirmar sang commander sang 302nd Infantry Brigade sang Philippine Army nga duha ka gina-alegar katapo sang New People’s Army ang napatay sa magkasunod nga engkwentro sa ciudad sang Sipalay, Negros Occidental.
Sa interview sang Bombo Radyo Bacolod kay Brigadier General Joey Escanillas, sang kaagahon sang July 31, may nabaton sila nga report nga may nakita nga armado nga tawo ang mga sibilyan kag nakilala sang mga ini nga isa sa suspek sa pagpatay sa ciudad sang Sipalay sang nakaligad nga Abril ukon Mayo nga gin-ako man sang NPA.
Suno kay Escanillas, gilayon man nga nagresponde ang katapo sang 15th Infantry Battalion sang Philippine Army sa nabaton nga report gikan sa mga sibilyan sa Sitio Bactolon, Barangay Camindangan, Sipalay City kag nagluntad ang engkwentro nga nagresulta sa kamatayon ni Ka Camil ukon natumod sang pamilya nga si Reygie Fundador, lalaki kag nagaedad sang kapin 23 anyos.
Suno diri, naclaim na sang pamilya ang bangkay sang napatay kag ini ang residente sang banwa sang Candoni kag aminado ang mga ini katapo sang NPA ang himata.
Nagpatigayon sang hot pursuit operation ang tropa sang gobyerno kun sa diin alas 2:00 ang takna kahapon sang hapon, nagluntad naman ang engkwentro sa isa naman ka Sitio sa nasambit nga Barangay kun sa diin napatay naman si Alyas Zian.
Si Zian ang reported nga extortionist sang makawala nga grupo kag ang mga ini ang katapo sang remnants sang South West Front.
Wala naman sang nasamaran sa hanay sang tropa sang gobyerno kag wala naman nagdugay ang engkwentro bangud ang mga katapo sang NPA ang wala nagadala sang malagba nga firearms sa tion nga magpadulong ang mga ini sa lugar nga madamo sang pumuluyo agud indi sila makilala.
Isa pa sa rason amo nga indi sila makumpriso samtang nagapatigayon sang extortion ukon recovery kag reactivation sang ila grupo. Suno diri, nadismantle na ang grupo apang may nabilin nga remnants.
Nagpanawagan si Escanillas sa mga nabilin nga katapo sang makawala nga grupo nga magpanaog kag magbalik sa sabak sang gobyerno agud nga mapatigayon ang pagsanyog sang komunidad.
