Natumod na ang duha ka mga ginapatihan rebelde nga napatay sa engkwentro batok sa 94th Infantry Battalion sa Sitio Maliko-liko, Barangay Carabalan, Himamaylan City sang Sabado sang hapon.
Sa interview sang Bombo Radyo Bacolod kay Brigadier General Inocencio Pasaporte, commander sang 303rd Infantry Brigade sang Philippine Army, napatay ang duha ka mga ginapatihan nga katapo sang rebelde sa nagluntad nga engkwentro sa tunga sang 94th IB kag rebeldeng NPA.
Suno kay Pasaporte, ang mga napatay ang ginkilala nga sanday Arnulfo Sabanal kag Jayson Sabanal, 30-anyos, lunsay mga pumuluyo sa Purok Lunoy, Sitio Cunalom, Barangay Carabalan, syudad sang Himamaylan.
Positibo nga ginkilala ang mga napatay sang Barangay Kagawad sang Barangay Carabalan.
Nakuha na sang pamilya ang mga bangkay sang duha ka mga rebelde.
Suno sa commander sang 303rd Infantry Brigade, duha ka engkwentro ang nagluntad sa Barangay Carabalan sang Marso 25 samtang isa naman ka engkwentro ang nagluntad sa natung-an sang Sitio Maliko-liko kag Sitio Lunoy sang Marso 26 alas-3:00 sang hapon kun sa diin napatay ang duha ka rebelde.
Malab-ot naman kuntani sang tropa sang gobyerno ang mga rebelde sa ila hide-out nga napahamtang man sa Barangay Carabalan.
Ginabanta naman nga 30 ka mga katapo sang rebelde ang naengkwentro sang tropa sang gobyerno sa magkatuhay nga engkwentro sang Marso 25 tubtob Marso 26.
Narekober sa lugar ang grenade; medical kit; siyam ka shot gun ammunition; isa ka scope, pila ka mga subversive documents kag nadugang pa ang recoveries sang March 25 encounter.
Ginalantaw man sang army commander nga ang mga NPA sa Barangay Carabalan, Himamaylan ang magapatigayon sang ila nga anibersaryo sa Marso 29 matapos nga makuha ang bag-o nga hayahay sang CPP-NPA-NDF.
