Arestado ang Top 9 kag Top 19 Most Wanted Person sa ciudad sang Bacolod matapos ginserbehan sang warrant of arrest sang Bacolod Police Station 2.
Sa interview sang Bombo Radyo kay Police Captain Paul Vincent Pendon, station commander sang Bacolod Police Station 2, ila ginserbehan sang warrant of arrest si Hermogenes Gacho, Top 9 most wanted person sa Bacolod City, bangud sa paglapas sa R.A. 10883 ukon New Anti-Carnapping Act of 2016.
Si Gacho, 24-anyos, residente sang Purok Kabuhi, Barangay 10, Bacolod City, ang ginserbehan sang warrant of arrest sang Bacolod Police Station 2 kaupod ang Highway Patrol Group kag Regional Intelligence Unit sa Purok Gracia, Barangay Singcang Airport, Bacolod City.
Samtang nadakpan naman si Joenard Hemungala, Top 19 most wanted person sa Bacolod sa Don Salvador Benedicto bangud sa kaso nga murder.
Suno kay Pendon, si Hemungala, 33-anyos, isa ka vendor, ang residente sang Barangay Esteban, banwa sang Murcia.
Kaupod sang Bacolod Police Station 2 ang City Investigation and Detective Management Unit (CIDMU) kag Anti-Kidnapping Group sang ciudad sa pagserbe sang warrant of arrest kay Hemungala.
Suno sa station commander, ila ginpangunahan ang operasyon bangud natabo ang mga krimen sa jurisdiction sang Bacolod Police Station 2.
Sa karun nakahunong na ang mga suspetsado sa Bureau of Jail Management and Penology – Taculing.
