Wala pa sagihapon sang identity ang duha ka mga nasapwan nga nagakaagnas nga bangkay sa parking area sang First Farmers Holding Corporation, Barangay Dos Hermanas, Talisay City, Negros Occidental kagab-i.
Sa interview sang Bombo Radyo Bacolod kay Police Lt. Ramon Juablar, Deputy Chief of Police for Operations sang Talisay City Police Station, ginkumpirmar sini nga may yara sang duha ka bangkay nga nasapwan pasado alas 6:00 ang takna kagab-i.
Suno kay Juablar, ang duha ka mga bangkay ang nasapwan sa likod nga bahin sang sugar central.
Ang isa sa mga bangkay ang nagasuksok sang itom nga bayo, denim shorts kag Lacoste-brand underwear, samtang ang isa ang nagasuksok sang denim shorts kag wala sang pang-ibabaw nga panapton.
Padayon sa karun ang imbestigasyon sang Talisay City Police Station agud nga matumod ang identity sang mga nasapwan nga bangkay nga nagakaagnas na.
