Duha ka bangkay ang nasapwan sa sulod sang tamburong sa bag-ong dalan, sa Barangay Felisa, Bacolod City kahapon.
Suno sa 16 anyos nga bata nga si alyas Jo, nagahampang sila sang ila napanimahuan ang maisog nga baho, ila ginpadulongan ang tamburong kag nakita ang isa ka bangkay.
Suno diri, wala nila una nakilala nga bangkay ini sang tawo, sa pagpati nga ini ang patay nga baboy nga ginhaboy sa area gani ila ini gintuslok sang kawayan.
Apang, dako ang kakibot nila sang makit-an ang nagalabaw nga ulo sang tawo.
Gilayon sila nga nangayo sang bulig kag sang ini ginpadulongan sang mga pumuluyo, nadiskubrehan nga duha ang bangkay sa sulod sang tamburong.
Ang isa amo ang nakita nanday Jo samtang ang isa naman yara sa pihak nga bahin sang tamburong nga nakaputos sa duha ka sako nga gintakop.
Una nga gintinguhaan nga makuha ang bangkay nga nakasulod sa sako bangod nga mas mahapos ini kuhaon kumparar sa nauna nga nakit-an.
Sa pag-abot sang team sang Scene of the Crime Operations (SOCO) kag punerarya, una nga ginkuha ang bangkay nga wala nasulod sa sako, kag nakit-an nga ini ang gamay lamang nga daw kaangay ang kadakuon sang isa ka bata, samtang sang ginkuha na ang bangkay nga nakasulod sa sako, ginbuksan ini kag nakit-an nga ini isa ka lalaki.
Sa interview sang Bombo Radyo kay Police Major Richard Fajarito, station commander sang Police Station 10, indi madeterminar kun babayi ukon lalaki ang isa ka bangkay bangod nga yara na ini sa advanced state of decomposition samtang positibo naman nga lalaki ang isa, apang indi na madeterminar ang identity sang mga ini.
Kasubong man nga indi na mahibaluan kun may pilas ukon ano ang gintunaan sang kamatayon sang mga biktima.
Nagkoordinar naman ini sa mga Police Station sa Bacolod kun may yara sang report nga nadulaan sang himata kasubong man nga nagkomunikar ini sa La Castellana Municipal Station bangod nga may yara sang duha ka namissing nga lalaki sang Abril 19, nga tubtob sa karun wala pa nakita.
