Ginakabig nga high ranking officials sa regional level ang duha ka mga rebelde nga napatay sa nagluntad nga engkwentro batok sa militar sa Hacienda Paraiso, Brgy Caduha-an, Cadiz City kahapon ala-1:51 sang kaagahon.
Nagdangat sa pito ang na-engkwentro sang Philippine Army kun sa diin naglawig sang pito tubtob walo ka minutos ang pagbayluhanay sang lupok.
Ginalantaw man nga ang naka-engkwentro ang mga remnants sang dismantled Northern Negros Front nga naka-engkwentro man sang militar sang Pebrero.
Sa karun wala pa matumod ang identity sang babayi kag lalaki nga NPA members samtang ginapatihan man nga ang lima nga wala nadakpan ang kabahin man sang high ranking officials.
Sa interview sang Bombo Radyo Bacolod kay 1st Lt. Dan Carlo Samoza, civil military officer sang 79th Infantry Battalion, padayon ang clearing operation sa pagtsekyar sang tracks agud matumod kun may iban pa nga pilason sa mga rebelde.
Wala naman sang nasamaran sa bahin sang militar.
Samtang, ginaconsolidate pa ang mga narekober nga mga subersibo nga mga dokumento kag war materials.
Pahayag sini, ginapalapad sang NPA ang ila area kasubong man nga posible luyag nila magpatigayon sang extortion activities ilabi na sa karun nga nagahilapit ang eleksyon, apang nagpasalig naman ini nga indi makabig nga threat ang natabo nga encounter para sa national and local elections.
