Nagpirma sang Memorandum of Agreement upod sa Bombo Radyo Bacolod ang duha ka non-governmental organization para sa pagpartisipar sa Dugong Bombo 2026 in partnership sa Philippine Red Cross sa Nobyembre 14.
Ini ang ginalakipan sang Hiligaynon Sectoral Tribal Council kag Philippine Guardian Brotherhood Incorporated.
Sa interview sang Bombo Radyo Bacolod kay Ainnie Batosbatosan, Presidente sang Hiligaynon Sectoral Tribal Council, bag-o pa lamang natukod ang ila nga grupo kag kalabanan sang miyembro ang diri pa lamang sa nagkalainlain nga Barangay sang Bacolod City.
Ini ginalakipan sang Brgy 39, Sum-ag, Cabug, Tangub, kag sila ang may mga miyembro man sa Brgy Mailum, Bago City.
Suno kay Batosbatosan, antes niya gintukod ang grupo, siya ang anay chairwoman sa Task Force Multiplier sang Philippine Guardian Brotherhood Incorporated sa Cadiz City.
Ang agenda sang iya grupo amo ang mabuligan ang mga pigado nga pumuluyo nga pangapinan ang ila duta nga gina-agaw sang mga dalagko nga kompanya kag pamilya.
Nagapasalig ang mga ini nga sila ang magasuporta sa Dugong Bombo 2026 sa bug-os sang ila masarangan.
Pahayag sini nga apisar ang super majority sang ila miyembro ang diri lamang sa Bacolod, ginatos naman ang ila nga miyembro.
Samtang sa interview sang Bombo Radyo Bacolod kay Venchito Magalona, chairman sang Philippine Guardian Brotherhood Inc. – Negros Island Region chapter, sila ang pila ka dekada na nga naga-upod sa kawsa sang Dugong Bombo, nga ginakabig na nila nga kabahin sa ila adbokasiya.
Pasalig niya nga ang ila miyembro ang willing nga magdonar sang dugo, nga makamaayo man sa ila ikaayong lawas.
Dugang pa niya nga mas mangin mahapos man sa ila miyembro magpangita sang dugo kun kinahanglan, kun sila ang nakadonar.
Suno kay Magalona, nagseparar na sila sa Region 6 sang matukod ang Negros Island Region.
Apang aminado si Magalona, nga indi nila ma-imbetar ang mga miyembro gikan pa sa malayo nga mga banwa kag ciudad bangod sa kamahal sang transport cost.
Sa baylo tipunon nila ang mga miyembro sa kaiping nga mga banwa kag ciudad kaangay sang Talisay City, EB Magalona, kag iban pa, sa blood letting activity, kaupod sa Task Force Kasanag Coalition.
Ang PGBI ang isa ka People’s Organization nga nagabulig sa ordinaryo nga mga pumuluyo paagi sa demokrasiya.
