Wala pa sa gihapon sang identity ang duha ka napatay nga gina-alegar remnants sang nadismantle na nga Central Negros One sang New People’s Army (NPA) sa engkwentro batok sa militar sa Barangay Sag-Ang, La Castellana, Negros Occidental kahapon alas-6:45 sang aga.
Ginabanta lima ka mga NPA members ang nakasumpong sang 62nd Infantry Battalion, nga ginreport nga nagapatigayon sang recruitment kag extortion activities sa nasambitan nga lugar.
Naglawig sang kapin tatlo minutos ang pagbayluhanay sang lupok nga nagresulta sang pagkamatay sang duha ka mga rebelde samtang napuhag naman sa nagkalainlain nga dereksyon ang iban pa.
Wala naman sang casualties sa bahin sang mga militar.
Sa interview sang Bombo Radyo Bacolod kay Lt Col. J-jay Javines, pinuno sang Division Public Affairs Office sang 3rd Infantry Division sang Philippine Army, gindala na sa funeral home ang bangkay sang duha ka rebelde.
Suno diri, ang duha ka NPA ang mga residente sang Barangay Buenavista, ciudad sang Guihulngan, probinsya sang Negros Oriental.
Nakig-angot naman ang 62nd Infantry Battalion sa punong Barangay sang Barangay Buenavista, Guihulngan City sa pag-identify sa identity sang duha.
Narekober sa area ang isa ka AR15 rifle, isa ka homemade shotgun, isa ka cal .45 pistol, magazines nga may serviceable ammunition, medical paraphernalia, duha ka backpack, mga subersibo nga dokumento, kag mga personal nga kagamitan.
