Nakilala na ang duha ka mga katapo sang New People’s Army (NPA) nga napatay sa engkwentro batok sa 62nd Infantry Battalion sang Philippine Army sa Barangay Sag-Ang, La Castellana, Negros Occidental kahapon sang aga.
Sa interview sang Bombo Radyo Bacolod kay Lt. Col. J-Jay Javines, pinuno sang Division Public Affairs Office sang 3rd Infantry Division sang Philippine Army, ang mga napatay nga remnants sang Central Negros One sang NPA amo sanday Bernard Torres Sr., residente sa Barangay Buenavista, Guihulngan, Negros Oriental kag Boy Laboy, residente sa Barangay Linantuyan, Guihulngan City, Negros Oriental.
Ang mga biktima ang ginkilala mismo sang ila pamilya, apang sila ang wala pa maclaim bangod ang mga ini ang magapaidalum pa sa nagakaigo nga proseso.
Madumduman nga nagluntad ang engkwentro sa tunga sang militar kag ginabanta lima ka mga NPA members alas-6:45 kahapon sang aga kun sa diin ang bayluhanay sang lupok ang naglawig sang tatlo ka minutos.
Paathag ni Javines nga apisar wala na sang nabilin nga guerilla front sang NPA, nagapabilin gihapon ang mga squad-size nga remnants.
Pahanumdom sini nga bisan nadismantle na, sarang gihapon ang mga rebelde nga makapatigayon ang recruitment sa tinutuyo nga mabuhi ang ila pwersa.
Sa masami, nagapadala man ang pamunuan sang Komiteng Rehiyon – Negros, Cebu, Bohol kag Siquijor sang mga opisyal agud magbulig sa mga remnants sa ila mga aktibidad, gani ini ang ila man hugot nga ginabantayan.
